1. Die in-beheer-mamma

Sy groet dadelik vriendelik en vol selfvertroue. Sy was óf hoofmeisie óf eerste-span-netbalkaptein óf albei by haar eie skool. Sy neem natuurlik leiding en ken almal se name, want sy het die WhatsApp-groepie se kontakte al gememoriseer.

Êrens gedurende die aand gaan sy jou vra waar jy betrokke wil raak, en jy gaan sterk moet staan as jy “nee” wil sê.

2. Die sosiaal-wanaangepaste mamma

Sy vermy oogkontak en lag twee minute ná die grappie. Sy werk nie graag saam met mense nie en maak dit duidelik dat sy nie eintlik betrokke wil wees nie. Tog wil sy by elke vergadering in die hoekie bly sit, en sy vra altyd daardie een ontydige vraag wat reeds beantwoord is.

3. Die ek-het-nie-tyd-nie-mamma

Sy het letterlik nooit tyd nie. Sy wil graag betrokke wees en het voor in die ry gestaan toe talente uitgedeel is, maar sy is altyd laat vir alles.

Sy het reeds veertien balle aan die rol, en die skoolbal is definitief nie nommer een op haar lysie nie.

4. Die klakous-mamma

Sy weet presies hoe om elke fout uit te wys. Sy dra nie juis by tot die groei van enigiets nie, maar huiwer nie om ’n donker wolkie oor elke sonskyndag te trek nie.

5. Die ek-dink-ek-kan-als-doen-mamma

Sy bied aan om met alles te help. Sy is ’n “pro” in alles, maar wanneer dit by die uitvoering kom, lyk dinge maar redelik amateur. Die meeste van haar projekte realiseer nooit nie, en ná die derde mislukte poging word sy in beheer van die hotdogstalletjie geplaas.

6. Die WhatsApp-groepie-skim-mamma

Sy praat nooit op enige groep nie. Sy ry self, selfs wanneer dit reën, met haar sonbril op en ken niemand se name nie. Haar kind hou nooit partytjies nie, en jy sal haar omtrent nooit by ’n skoolvergadering sien nie.

7. Die ek-is-net-hier-vir-die-wyn-mamma

Sy is gewoonlik reeds een glas voor die res. Sy sê maklik JA en hou van enige werkie wat nie te veel verantwoordelikheid verg nie. Sy het altyd ’n groepie mede-“wynmammas” wat saam oor stout grappies lag.

8. Die gesonde-snack-mamma

Sy bring net vars of tuisgemaakte happies. Haar kind is intolerant vir iets, en kry groen smoothies vir pousekos ingepak. Hierdie mamma dra gewoonlik ’n gymbroek en het blykbaar nie grimering nodig nie.

9. Die ek-werk-nie-mamma

Sy is altyd bereid om briefies te vou of winkel toe te ry vir die laaste goedjies. Al haar gesprekke begin met: “Ek weet nie hoe jy dit doen nie …” en eindig met: “Ek werk eintlik baie harder as toe ek gewerk het.”

10. Die nie-my-eerste-rodeo-nie-mamma

Sy het reeds twee, drie, vier of vyf kinders op skool, of hulle is klaar deur die skoolstelsel. Sy ken elke onderwyser op die naam, weet wat elke kwartaal gaan gebeur en weet presies waar die spesiale Ouerverteenwoordiger-voorskote in die klubhuis gebêre word.